फरकांडे येथे बिबट्याच्या हल्ल्यात वासरू ठार, शेतकऱ्यांना सावधानतेचा इशारा

कासोदा. सुरेश ठाकरे ) येथुन जवळच असलेल्या मौजे फरकांडे येथील शेतकरी गोकुळ रामदास कोळी यांच्या जानफळ शिवारातील शेतात गुरे बांधलेले असताना रात्री बिबट्याने गाईच्या वासराला हल्ला करून ठार केले. वासरू अर्धवट खाऊन सोडून दिले. सकाळी शेतकरी गोकुळ कोळी हे चारा पाणी व दूध काढण्यासाठी गेले असता दोन वर्षाचे वासरू अर्धवट खाल्लेले आढळले. त्यांनी तात्काळ पोलीस पाटील अमृत देशमुख यांच्याशी संपर्क करून वनविभागाला कळवले. वनपरिक्षेत्र अधिकारी दत्तात्रय लोंढे यांच्या मार्गदर्शनाखाली विजय माळी यांनी घटनास्थळी भेट देऊन पंचनामा केला. जागेवरील हिंस्र प्राण्याचे पायांच्या ठशांचे निरीक्षण केले असता बिबट्यानेच वासरू मारून खाल्ल्याचे स्पष्ट केले. फरकांडे व जानपळ शिवारातील शेतकऱ्यांनी आपले पशुधन शेतात न बांधता गुरांना घरीच बांधावे. शेतकरी शेतमजूर यांनी सावधानता बाळगण्याचे आवाहन वनविभागाने केले आहे. सदर शेतकऱ्याचे 20 ते 25 हजार रुपये पशुधनाचे नुकसान झाले असून मदत मिळण्याची मागणी केली आहे.