नंदुरबार: अफवेमुळे एकतर्फी दगडफेक; पोलिसांचा वेळीच हस्तक्षेप आणि कठोर कारवाई

नंदुरबार (प्रतिनिधी):- शहरात काल, रविवारी, दोन वेगवेगळ्या घटनांमुळे निर्माण झालेल्या तणावपूर्ण परिस्थितीला पोलिसांनी योग्य वेळी हस्तक्षेप करून नियंत्रणात आणले. मात्र, रात्री 10 वाजेच्या सुमारास पसरलेल्या अफवेमुळे एकतर्फी दगडफेक करण्यात आली. परिस्थिती नियंत्रणात आणण्यासाठी पोलिसांनी 12 अश्रुधुराच्या नळकांड्यांचा वापर करून जमावाला पांगवले.पोलीस अधीक्षक श्रवण दत्त यांनी दिलेल्या माहितीनुसार, ज्या लोकांनी कायदा हातात घेतला त्यांच्यावर प्रचलित नियमांनुसार कठोर कारवाई केली जाईल.

आतापर्यंत 18 जणांवर कारवाई करण्यात आली असून, त्यामध्ये 7 अल्पवयीनांचा समावेश आहे. ही बाब दुर्दैवी असल्याचे त्यांनी नमूद केले आहे.शहरातील शांतता टिकवण्यासाठी नागरिकांनी अफवांवर विश्वास ठेवू नये आणि भीती बाळगण्याचे कारण नाही, असे आवाहनही पोलीस अधीक्षकांनी केले आहे. कायदा व सुव्यवस्था भंग करणाऱ्यांवर कोणतीही दयामाया दाखवली जाणार नाही, अशी स्पष्ट भूमिका त्यांनी मांडली.शहरातील संवेदनशील भागात मोठा पोलीस बंदोबस्त तैनात करण्यात आला असून, कायदा व सुव्यवस्थेवर पोलिसांचे पूर्ण नियंत्रण असल्याचेही त्यांनी सांगितले आहे.